العيد مبارك

بسم الله الرحمن الرحيم

السلام عليكم ورحمة الله وبركاته

العيد مبارك وكل عام والامه الاسلامية بخير وقوه

أسال الله ان يتقبل صيامنا وقيامنا وان لا يحرمنا الاجر

 

           

 

مدونة طالبة متوهقة

بسم الله الرحمن الرحيم

السلام عليكم ورحمة الله وبركاته

من تقريباً اسبوعين ومدونتي ( طالبة متوهقة ) مغلقة بسبب اختراق الموقع الذي راسلت الاداره ولم اجد منهم رد

طبعا للي ما كان يعرف عن هذي المدونه سأكتب نبذه مختصره جدا جدا جدا عنها الان ومن ثم سأضع وصله لجميع المواضيع التي كتبتها في تلك المدونه في قسم ( طالبة متوهقة ) وكم كنت اتمنى ان انقل لكم التعليقات لكن قدر الله وماشاء فعل

هي عباره عن مدونه خصصتها لاكتب عن معاناتي مع التعليم والدراسة ـ وعن محاولاتي لتحقيق طموحي ـ وعن بعض مواقف المدرسة بشكل عام

هذي هي باختصار

واسال الله ان يوفقني وياك اجمعين

 ———-> تحب الاختصااااااااااااااااااااااااااااار خخخخخخخخخ

امور اشغلتني

بسم الله الرحمن الرحيم

السلام عليكم ورحمة الله

كيفك اليوم ووش اخباركم مع الصيام والدوامات او الطبخ هههههههههههههههه

اليوم ابي اتكلم عن كذا امر اشغلني في المدرس —-> راح تكثر مواضيعها خخخخخخخخخ

اولاً : اكتشفت امر احزن قلبي بشكل ما تتصورونه بصراحه ، شيء مؤلم ان يرى بين طالباتنا وامهاتنا واخواتنا

وهو ومع الاسف ان اغلب البنات لما يكون وقت الصلاة ما يعرفون يصلون تخيلوا ، شيء مؤلم ان ترى هذا الامر وليس من واحده او اثنتين او حتى عشره اكثر الطالبات والله العالم

من المواقف اللي حصلت

1- وحده واقفه تصلي وشعرها كله من قدام طالع ، يعني اللي يشوفها يفكرها جالسه بين صحباتها ومتميلحه بطرحتها والله شعرها طالع ، المهم وقفت جنبها وقلت لها شعرك طالع وابتعدت ، ورجعت نظرت لها مره اخرى الا هي بنفس الشكل

قلت في نفسي (( هو )) وهذا صوت يطلع مع التعجب

رجعت وقلت لها مره ثانيه وهالمره وقفت اشوف وش بتسوي ما غطت شعر تخيلوا

رجعت كررت عليها ثالثه ونفس الشيء فقلت لا حول ولا قوه الا بالله  ورحت صليت

2- وقفت جنبي وحده وانا في صلاتي اخلفتني فيها طبعا والسبب انها صلت بعدي وانتهت قبلي ووالله مو من زود في صلاتي لكنها كانت مسرعه بشكل غيرطبيعي ما يمديها تركع الا ترفع وما يمديها ترفع الا تسجد

طبعا مع الاسف انهت صلاتها قبلي فما امداني اقول لها شيء

3- لبست عبايتي ورفعت يديني ابي اكبر الا اشوف اللي تصلي بدون جلال ولا شيء بس مغطيه شعرها ،بصراحه انصدمت وجتني الضحكه وكتمتها بالقوه والله لكن وش اقول

جلست افكر قلت الحين اخاف اقولها تراك نسيتي جلالك ، او اسالها وين الجلال تقوم تنفضني بكلامها او طولت لسانها

فكرت في نفسي من شروط الصلاة ان تغطي المرأه نفسها ما عادا وجهها الا اذا كان هناك رجال طيب هي لابسه المريول ومتغطي كل شيء فيها فهل هذا يجزئي عن الجلال ؟؟؟

بصراحه وقفت حائرة ولم استطع ان اقول شيء ، لان لن يكون لدي حجة قويه مع الاسف او بالاصح لان ما مر على بالي ان ارى احد يصلي بالطريقة هذي فكبرت وصليت واسال الله ان لا يسالني عنها يوم القيامه ….

هذا ما كان بالنسبة للصلاة ..

ثانياً :اما ما يخص النظافة حدث ولا حرج اعوذبالله افيييييييييييييه من قلبي وبقوه بعد

قسم بالله اذا ركعت اكتم نفسي علشان ريحت رجولهم الله يقرف ابليس ما ادري وش فيهم ما يغسلون شرباتهم ولا ما يغسلون رجلهم من الاساس ولا ايش القصه بالضبط ، ما ادري بصراحه المهم انهم وسخين 

وياريت المسأله توقف على الرجول بس ، وكمان ريحة اجسادهم ومرايلهم اللي تطرح الكبد

مدري هم ما يشمون ملابسهم ما يتفقدونها ولا وش قصتهم ، او ما يفكرون بانفسهم وبجمالهم ونظافتهم ؟؟!!!!!!

المشكلة ان البعض متزوجات مع الاسف مدري كيف ازواجهم صابرين عليهم

ولا بعد يزعلون لو اعرس عليها ولا لقته يكلم غيرها ولا طالعه مع ثانيه ((( طبعا هذا لا يعني اني اوافق على الخيانه الزوجية لكن لا انكر ان هذه الامور سبب )))

اما اخر شيء لاحظته فيهم ان اغلبهم يعانون كبت عاطفي ونفسي ويعيشون في ضغوط صعبه والله العالم

والبعض الاخر يعيش بشخصيتين متناقضتين

السبب في ذلك طريقة كلامهم التافه اللي انا متأكده ان كل وحده تعرف ان كلامها ماله داعي ولا له معنى

وثاني شيء الصراخ اللي ماله داعي وكأنه تفريغ عن الضغوط اللي يعيشونها في منازلهم مع ازواجهم او اخوانهم

و لاعاد الضحك اللي ما يراعون اذا فيه احد تعبان ولا يفضل الهدوء ولا تعود على كذا

اصلا حتى هم ما يفكرون في انفسهم كيف يكون شكلها وهي فاتحه فمها وتضحك باعلى صوت لها اعوذبالله منظر مقزز قسم بالله اوف بس منهم الله يهديهم

تعرفون ايش اللي يقهرني فعلاً انك لما تحاول تقدم لهم مساعده بالمجان ومن طيب خاطر ما يقبلونها

حتى لو تكلمت في عرض الكلام او لمحت ما راح تلاقون اي قبول

الكثير من البنات هناك يعيشون اوهام غريبه وفوق هذا ما يحاولون يتخلصون منها او انهم يستغلون اي فرصه تساعدهم

الله يعينهم اجمعين

وبس

يومي الأول في المدرسة

بسم الله الرحمن الرحيم

السلام عليكم ورحمة الله

كيف الحال ياللي تتابعوني بصمت هههههههههههههه الشهر عليكم مبارك بداية

ثم اقولك

الاسبوع الماضي بدأ الفصل الدراسي كما تعرفون وبما اني كنت اريد ان احول ذهبت فعلاً للمدرسة على هذا الاساس

ومثل المره الاول روحه وجيه وكل وحده توديني يمين ولا يسار وفي النهاية وصلت لتعبئة الاوراق النهائية

وكتابته خطاب طلب التحويل

قالت لي المراقبه ليش تبين تحولين فاعطيتها الاسباب كاااااااااااااامله

فقالت ((انتي تدرين انك راح تدرسين شهر كامل علشان الاختبار وفي نفس الوقت راح تحضرين الحصص في القسم العلمي ))

طبعا صدمت من كلامها يعني اضيع شهر في العلمي ويفوتني دروس في الادبي واخرتها لازم اجيب علامه تقارب المية علشان احول

احبطت بصراحه وقلت قدر الله وماشاء فعل وقررت ان اكمل في القسم العلمي

وبديت اروح للمدرسة بالمريول البني والجديله والشنطة

طبعا من الصدمه صار لي موقف لازم اشاركم فيه واللي هو

( سألت المراقبة التابعه لقسم تعليم الكبيرات وقلت لها وين فصل ثالث علمي قالث لي اخر السيب ،،، قلت شكرا

رحت لاخر السيب ولقيت وحده من الزميلات اللي من اكثر من سنه ما شفتها سلمت وجلسنا نسولف شوي بعدين ههههه ما ننعطى وجه في السوالف ،،،،

المهم كان فيه مدرسة جالسه على كرسي على يسارنا فرحت لها وقلت لها هذا فصل ثالث علمي ؟؟ قالت ايه

اعدت سؤالي وأشرت على الفصل قالت مره ثانيه ايه قلت طيب شكرا

رحت للفصل ودخلت وكان الفصل مرتب ونظيف و مشرق بصراحه يعني سعة صدر

كانت نهاية الحصه الاول وبعد ما انتهت دخلت مدرسة الرياضيات وبدت تعطي الدروس طبعا وفي الاثناء نهاية الحصه الاولى وبداية الثانيه كان رأسي مشغول بالتحويل وصدري ضايق

بدأت تعطي الدرس وتشرح المدرس فبديت اركز معها فاستغربت الدروس فقلت يمكن هذا من تاثير الصدمه

فجأه قالت المدرسة ياللا يا ثاني !!!!!!!!!!!!! ثاني ترددت هذه الكلمة في راسي فمسكت كتاب الطالبة المجاوره

وضحكت على نفسي الا المدرسة تلتفت علي وتقول ياللا جاوبي

ضحكت في وجهها واشرت لها تعالي فقربت قلت لها انا غلطانه بالفصل ههههههههههههههههه وضحكت على نفسي

وضحكت وطلعت من فصلهم

وتوجهت لفصلي اللي يوم دخلت كأني داخلة مأتم ))

هذا كان يومي الاول اللي هو يوم السبت والباقي راح يجي

مالت عليهم

بسم الله الرحمن الرحيم

السلام عليكم

اليوم رحت للمدرسه على اساس اخذ جدول الاختبار حتى احول للادبي

اسال احد المراقبات ( انا علمي وابي احول ادبي وانتوا طلبتوا اجي اليوم وجيت فمن وين اخذ الجدول )

قالت لي انتي كبيرات ( قصدها قسم المتابعه - تعليم الكبيرات ) قلت ( نعم انا منهم ) قال اطلعي فوق

فوق هذا طبعا الدور الثالث ، طلعت الدور الثالث وتوجهت للمدرسه التي اعطتني اسمها فلما وصلت لها وقلت لها نفس الكلام وان المراقبه ارسلتني لها ضحكت وقالت ( فلانه هذي وحده تبي تحول من علمي لادبي وش اسوي لها ) !!!!!!!!!!!!!!!!!!!!!!!!! بعدها قالت روحي للمديره انا ما اعرف

نزلت ثانيه للمديره وبعد الانتظار اللي عور رجولي ، وعمتي المديره جالسه تسولف دخلت عليها وقلت لها اللي ابي

قالت هاه وشو وين ساكنه ؟ !!! ) وين ساكنه والله عجيب ردي على سؤالي بعدين فكري وين ساكنه

دخلت احد المراقبات فقالت لها  ( جت جداول الاعاده والتحويل ) قالت المراقبه تعالي اول يوم في الدراسه تكون نزلت وبعدها نرفع طلب وكلام كثيررررررر

والله عجيب كيف ما يعرفون هذا الامر وهو كل سنه يحصل عندهم ، انا كنت جالسه افكر اقول لو امي اللي راحت لهم كان بيطلعونا وينزلونها على كيفهم لان كل وحده ماهي عارفه وش شغله بالضبط

وكانهم جايين علشان بس ياخذون الرواتب بدون ما يتعبون انفسهم

المهم طلعت من عندهم زعلانه ومتضايقه مره ، وكنت اسال ربي ان تكون هذي نهاية العقبات اللي اعرفها كل سنه وان تعدي السنه هذي على خير بدون امراض او مشاكل مرعبه

وبس

حان الوقت

بسم الله الرحمن الرحيم

السلام عليكم

كيف الحال جميعا مع ان  مافيه احد يسال لكن مو مشكلة المهم

اليوم كنت جالسه اعيد حساباتي واعيد تقييم انجازاتي واغير بعض الاهداف التي اكتشفت انها اساساً ليست بهدف او انها غير مناسبة

وكان من ضمنها تغير محور دراستي حيث اني ادرس في القسم العلمي ، فقررت ان اغير للقسم الادبي صحيح اني لا احبه منذ عهد طويلاً الا اني توجهي في السنين الاخيره للبحث في التاريخ والقراءه في كتب الادب فكان هذا دافعي

ومن باب اخر أرجوا من الله تعالى ان تكون محاولتي هذه ناجحه لهذه السنه وانهي دراستي الثانويه

وانا متاكده انه لن يصيبني الا ما كتب لي وأن كل تأخير سيكون امره خير بالنسبه لي

ادعوا لي بالتوفيق والنجاح